काठमाडौं । चिनियाँ कम्पनी एसएआईसी र विलिङसँग अमेरिकी कम्पनी जनरल मोटर्सको सहकार्यमा तयार भएको विलिङ मिनी एयर ईभी नेपाली बजारमा बज्र ग्रुपले ल्याएको छ । कम्पनीले अहिले २५ हजार रुपैयाँ बुकिङ रकम लिएर यो सानो ईभीको बुकिङ लिइरहेको छ ।
नेपाल मोटर्सले विलिङको सानो ईभी ‘विलिङ मिनि एयर’को मूल्य दशैंअघि नै सार्वजनिक गरेको थियो । कम्पनीले नाडा ईभी एक्स्पोमा नै प्रि बुकिङ खुल्ला गर्दै मूल्य सार्वजनिक गरेको हो ।
विशेषत सहरी क्षेत्रको लागि उपयुक्त यो मिनि कार दुई फरक भेरियन्टमा बजारमा आउन लागेको हो । कम्पनीले २०० किमि रेन्ज दिने भेरियन्टको मूल्य २४ लाख ९९ हजार र ३०० किमि रेन्ज दिने भेरियन्टको मूल्य २९ लाख ९९ हजार तोकेको थियो ।
कम्पनीले इन्डोनेशियामा उत्पादन भएको विलिङ एयर मिनि नेपाल ल्याएको हो । विशेषत अहिले बैंक ब्याजदर महंगो भएको कारण धेरै मानिस गाडी किन्न हिचकिचाइरहेको समयमा कम्पनीले कम मूल्यमा नै कारको आवश्यकता पुरा गर्ने खालको मोडल ल्याएको हो ।
विद्युतीय गाडीमा मूल्यको ८० प्रतिशतसम्म बैंकले कर्जा उपलब्ध गराउने भएको कारण कम डाउन पेमेन्टमा नै यो कार किन्न सकिने छ । साथै, लिएको कर्जा ७ वर्ष भित्र मासिक किस्ताको हिसावले तिर्न सकिन्छ ।
यसरी विलिङ एयर मिनिको स्टायडर्ड भेरियन्ट किन्ने ग्राहकले ४ लाख ९९ हजार ८०० रुपैयाँ डाउन पेमेन्ट तिर्नु पर्ने हुन्छ । त्यसैगरी अहिले बजारमा कम्तीमा १५ प्रतिशत ब्याजदर चलिरहेको कारण स्टायडर्ड भेरियन्ट खरिद गर्ने ग्राहकले ३८ हजार ५८० रुपैयाँ मासिक किस्ता तिर्नु पर्ने हुन्छ ।
त्यसैगरी विलिङको लङ रेन्ज मोडल किन्न चाहने ग्राहकले ५ लाख ९९ हजार ८०० रुपैयाँ डाउन पेमेन्ट गर्नु पर्छ भने बाँकी रकम कर्जा सुविधा लिन सक्नेछन् । यसरी कर्जा लिँदा ७ वर्षसम्म मासिक ४६ हजार ३०० रुपैयाँ किस्ता तिर्नु पर्ने हुन्छ ।
यस्तो छ विलिङ एयर मिनि
सानो साइज, राम्रो रेन्ज र सुरक्षा फिचरमा पनि राम्रो भएको कारण चीनमा मात्रै दुई वर्षमा ७ लाख यूनिट वूलिङ विक्री भएको छ । यो मिनि कारको लम्बाई २९७२ एमएम, चौडाई १५०६ एमएम र उचाई १६३० एमएम रहेको छ ।
नेपाल आउने वूलिङ एयर दुई मोटर र दुई ब्याट्री अप्सनमा उपलब्ध हुनेछ । यसको कम रेन्ज दिने स्टायडर्ड भेरियन्टमा १७.३ किलोवाट आवरको ब्याट्री रहने छ । यसमा मोटर पनि ३० किलोवाट क्षमताको मात्रै रहने छ । यसले एक पटकको फुल चार्जमा २०० किमि रेन्ज दिने कम्पनीले दावी गरेको छ ।
लङ रेन्ज मोडल भने २८.४ किलोवाट आवरको ब्याट्रीमा उपलब्ध हुनेछ । यसमा मोटर पनि ५० किलोवाट क्षमताको दिइएको छ । यसले एक पटकको फुल चार्जमा ३०० किमि रेन्ज दिने कम्पनीको दावी छ ।
दुई सिट र चार सिट अप्सनमा नेपाल आउने विलिङ एआई फिचर भएको मिनि ईभी हो । सुरक्षाको लागि यसमा एयरव्याग, इबीडी सहितको एबीएस, टायर प्रेसर मोनिटर, रिभर्स पार्किङ सेन्सर, रिभर्स क्यामेरा जस्ता फिचर उपलब्ध छन् ।