लमजुङमा डेढ महिनाअघि सम्बन्ध विच्छेद गरेको एउटा जोडीले डेढ महिनापछि पुनः विवाह गर्ने भएको छ । उनीहरुले भोलि जिल्ला अदालत, लमजुङमा कोर्ट म्यारिज गर्न लागेको बताइएको छ ।
यसअघि जिल्ला न्यायाधीश शिवप्रसाद खनालले मात्र होइन स्रेस्तेदार उदयराज काफ्लेलेसमेत बारम्बार यस्तो राम्रो जोडी नछुट्टिन भन्दै आग्रह गरेका थिए । उनीहरुको बेमेलको बारेमा जिल्ला मेलमिलाप केन्द्रमा पनि पटक पटक छलफल गरिएको थियो । तर, उनीहरुले जसरी पनि छुट्टिने भन्दै अड्डी कसेको बताइन्छ ।
त्यतिखेर श्रीमानले हेलाँहोचो गरेपछि खान लाउन आपत परेको जस्ता आरोप श्रीमतीले लगाएकी हुन् । बेसिसहर–११, कार्कीडाँडा माइती भइ दोर्दी–१, अलैंचेका अमृत थापासँग विवाह गरेकी शिला कुतालले कसैको कुरा नसुनेपछि सम्बन्ध विच्छेद भएको थियो ।
गत भदौ पहिलो साता जिल्ला अदालत लमजुङमा सम्बन्ध विच्छेदको निम्ति परेको उजुरीले भदौ २८ गते कानुनी रूपमा मान्यता पाएको थियो । अदालतमा कैयौंको अनुरोधलाई लत्याएर गरिएको सम्बन्ध विच्छेद डेढ महिना पनि नपुग्दै जोडिन लागेको बताइन्छ ।
श्रीमतीले आफूमाथि हेलाँ र कुटपिट गरेको जस्ता आरोप लगाए पनि सम्पत्ति केही नलिई छुट्टिएको उक्त जोडीले हिजो दिउँसो अदालतमा पुगेर कोर्ट म्यारिजको लागि निवेदन दिएका छन् । गर्भवती अवस्थामा सम्बन्ध विच्छेद नहुने कानुनी व्यवस्था हुँदाहुँदै कसरी ‘डिभोर्स’ भयो भन्नेबारे निमित्त स्रेस्तेदार विश्वराज कुँइकेल आफैं चकित भएका थिए । त्यत्रो बबन्डर मच्चाएर छुट्टिभिन्न भएको जोडी फेरि मिल्छौं भनेर अदालतमा गएपछि नाइँनास्ती गर्न पनि भएन । त्यसैले भोलि कार्यालय खुलेपछि मात्रै विधिवत रूपमा ‘कोर्ट म्यारिज’ गरिने कुँइकेलले जानकारी दिएका छन् ।-अञ्जनकुमार/जन आस्था