अभिनेत्री नम्रता श्रेष्ठका कारण केकी अधिकारीको भाग्य चम्किने भएको छ । फिल्म ‘प्रसाद २’ मा निर्माण युनिटले अभिनेत्रीको मुख्य भूमिकाको लागि केकीलाई अनुबन्धित गरेको छ ।
स्क्रिप्ट फाइनल भएसँगै अभिनेत्री नम्रता श्रेष्ठले अर्को फिल्मका कारण समय दिन नसक्ने भएपछि निर्माण टिमले उनको ठाउँमा केकीलाई चयन गरेको हो । बिहीबार निर्माता र उनीबीच सम्झौता भएको छ ।
निर्देशक सुदर्शन थापाले निर्देशन गर्न लागेको चलचित्र ‘प्रसाद २’ मा पहिला नम्रता र अभिनेता विपिन कार्की मुख्य पात्रमा देखिने भएका थिए । तर छायांकन सुरु गर्ने अन्तिम तयारीमा पुगेपछि अभिनेता कार्की र निर्माता सुवास थापाविच पारिश्रमिकको बिषयमा अड्च’न आयो ।
‘प्रसाद २’ लाई ‘प्रसाद’ को सिक्वेल बन्न लागेको चलचित्र हो । अभिनेत्रीको खोजीमा निर्माता र निर्देशक ऋचा शर्मा, सुरक्षा पन्त हुँदै केकीसम्म पुगेका थिए । अब मंसिरबाट फिल्मको छायांकन गर्ने तयारीमा निर्माण टिम छ ।
सुदर्शन थापाको निर्देशन र सुभाष थापाको निर्माण रहने यस फिल्ममा अर्पण थापा, राज कटुवाल, लोकमणि सापकोटा, प्रकाश घिमिरे, कमलमणि नेपाल, कुल्दिप अधिकारी, विशाल पहारीलगायतको पनि अभिनय रहनेछ । फिल्मको कथा पत्रकार सुशिल पौडेलले लेखेका हुन् ।