अन्तर्राष्ट्रिय क्रिकेट परिषद आईसीसी ले नेपाली राष्ट्रिय क्रिकेट टिमका पूर्वकप्तान सन्दीप लामिछानेलाई झड्का दिएको छ। आईसीसीले अपडेट गरेको टी–२० को नयाँ वरीयतामा सन्दीप एकैपटक दुई स्थान तल झरेका छन्।
बलिङतर्फ सन्दीप २ स्थान तल झरेर ७३औँ स्थानमा रहेका छन् । नेपाली अलराउन्डर दीपेन्द्रसिंह ऐरीको ब्याटिङ वरीयता सुधार भएको छ। नयाँ वरीयतामा दीपेन्द्रको वरीयता एक स्थान सुधार भएको हो।
दीपेन्द्र यसअघि ६२ औं स्थानमा रहेका थिए। नयाँ वरीयतामा दीपेन्द्र ६१ औं स्थानमा रहेका छन्। ब्याटिङतर्फ नै कुशल भुर्तेलको वरीयता यथावत रहेको छ। नयाँ वरीयतामा कुशल ५३औं स्थानमा यथावत रहेका छन्।
अलराउन्डरतर्फ भने दीपेन्द्र एक स्थान तल झरेर १० औं स्थानमा रहेका छन्। ब्याटिङतर्फ पाकिस्तानका मोहम्मद रिजवान शीर्ष स्थानमा यथावत रहेका छन्। बलिङमा अष्ट्रेलियाका जोस हेजलउड शीर्ष स्थानमा रहँदा अलराउण्डरतर्फ भने बंगलादेशका शाकिब अल हसन शीर्ष स्थानमा फर्किएका छन्।