एजेन्सी – विभिन्न खेल मिडियाहरुमा आएका रिपोर्टहरुलाई मान्ने हो भने फ्रेन्च युवा स्टार किलियन एम्बाप्पे नयाँ गन्तव्यको खोजिमा जित्ने भएका छन्। विश्वकप सकिने बितिकै एम्बाप्पेले नयाँ क्लब खोज्ने निर्णयमा पुगेको विभिन्न खेल मिडियाहरुले जनाएका छन्।
स्पेनिस समाचार आउटलेट स्पोर्टका अनुसार एम्बाप्पेले पेरिस सेन्ट जर्मेन(पिएसजी) छाड्ने निर्णय गरिसकेका छन् र उनी छिट्टै नै आफ्नो निर्णय क्लबको बोर्डलाई जानकारी गराउने पक्षमा रहेका छन्।
क्लबले गरेका धेरै जस्तो वाचा पूरा नगरेपछि एम्बाप्पे क्लबमा नबस्ने निर्णयमा पुगेको स्पोर्टले जनाएको छ। साथै एम्बाप्पेले पिएसजी भन्दा नयाँ क्लबमा गएर व्यावसायिक जीवनमा नयाँ गति दिने सोच बनाएको स्पोर्टको समाचारमा उल्लेख गरिएको छ।
गत मे महिनामा एमबाप्पे फ्रेन्च क्लबसँगको आफ्नो सम्झौताको म्याद सकिएसँगै रियल मड्रिडमा आबद्ध हुने अवस्थामा थिए। तर विभिन्न कारणहरुले गर्दा एम्बाप्पेले पिएसजीमै निर्णय गरेका थिए। त्यसबेला फेन्च राष्ट्रपतिले समेत एम्बाप्पेलाई पिएसजीमै रहन दबाव दिएको चर्चा गरिन्छ।
पिएसजीले विश्वकै उच्च पारिश्रमिक दिएर एम्बाप्पेलाई क्लबमा रहन राजी गराएको थियो। साथै त्यसबेला क्लबले एम्बाप्पेलाई विभिन्न वाचाहरु पनि गरेको थियो। जसलाई पिएसजीले पछि आएर पूरा गर्न सकेन।
खबरका अनुसार एम्बाप्पे क्लब छाड्ने निर्णयमा पुगिसकेका छन् र क्लब परिवर्तनका लागि उनी आफ्नो पारिश्रमिक कटौती गर्न पनि तयार छन्। एम्बाप्पे सन् २०१७ मा मोनाकोबाट पिएसजी पुगेका थिए। त्यसबेला पिएसजीले उनका लागि १ सय ८० मिलियन युरो खर्च गरेको थियो।