एजेन्सी – ट्रान्सफर मार्केटका चर्चित जानकार फाब्रिजियो रोमानोले लियोनेल मेस्सी र पेरिस सेन्ट जर्मेन(पिएसजी) बीच यसै साता नयाँ सम्झौता हुन सक्ने कम सम्भावना रहेको बताएका छन्।
रोमानोले मंगलबार मात्रै मेस्सी र पिएसजी बीच हुने भनिएको सम्झौता सम्बन्धमा सामाजिक संजाल मार्फत अपडेट बाहिर ल्याएका हुन्। रोमानोका अनुसार मेस्सी र पिएसजी बीच सम्झौता थप गर्ने विषयमा डिसेम्बर महिनामै मौखिक सहमति भएको हो।
विश्वकप सकिनु अगाडी नै दुई पक्ष बीचको छलफलले सकारात्मक मोड लिएको रोमानोले जनाएका छन्। मेस्सी पक्ष र पिएसजी बीच थप छलफलहरुका लागि भेट हुन बाँकी छ। सो छलफलले नै मेस्सीको नयाँ सम्झौताको लम्बाइ, तलब विवरण र थप कुराहरू तय गर्नेछ।
दुवै पक्ष सम्झौता थपका लागि मौखिक रुपमा सहमत भइसकेका कारण दुवै पक्ष हतारो गर्ने पक्षमा रहेका छैनन्। रोमानोका अनुसार दुवै पक्ष बीच क्रमिक रुपमा छलफल अगाडी बढ्नेछ।
“नयाँ सम्झौता यस हप्ता हस्ताक्षर हुने अपेक्षा गरिएको छैन। यसले केहि समय लिन सक्छ तर योजना पहिले नै स्पष्ट भएकोले कुनै हतार छैन।”,रोमानोले सामाजिक संजालमा लेखेका छन्,”विश्वकपको अन्तिम दिनहरूमा दुई पक्षबीच मौखिक सहमत भएको थियो। सम्झौताको लम्बाइ, तलब विवरण र थप कुराहरू बारे छलफल गर्न लियो मेस्सीको क्याम्पसँग नयाँ बैठक हुनेछ।”
त्यस्तै रोमानोले मेस्सीलाई भित्र्याउन बार्सिलोनाले कुनै प्रयास नगरेको पनि खुलासा गरेका छन्। उनका अनुसार बार्सिलोनाले मेस्सीलाई फिर्ता लैजान कुनै आधिकारिक प्रस्ताव नै गरेन।