एजेन्सी – सन् २०२२ को अन्त्यमा पोर्चुगिज स्टार क्रिस्टियानो रोनाल्डो सबैलाई चकित पार्दै साउदी अरेबियन क्लब अल-नासरमा आवद्ध भए। त्यसको केहि दिन पछि रोनाल्डो साउदी पुगे।
रोनाल्डो विश्वकै उच्च पारिश्रमिकमा साउदी क्लबमा आवद्ध भएका हुन्। साउदी क्लबले गत साता मात्रै रोनाल्डोलाई एक कार्यक्रममा बीच भव्य स्वागत पनि गर्यो। रोनाल्डोलाई स्वागत गरिएको पूरा विश्वले हेरेको थियो।
केहि दिन रोनाल्डोको नाम साउदी क्लबमा दर्ता हुन सकेन। तर एक विदेशी खेलाडीलाई हटाएसँगै रोनाल्डोको नाम साउदी लिगमा दर्ता भइसकेको छ। यससँगै रोनाल्डोका लागि साउदीमा खेल्ने बाटो खुलेको छ। साउदी क्लब अल नसरमा कीर्तिमानी मूल्यमा अनुबन्धन भएका रोनाल्डोले कहिले डेब्यू गर्लान् भन्ने प्रतिक्षामा विश्वभरका उनका समर्थक रहेका छन्।
कीर्तिमानी रकममा साउदी अरेबियाको क्लब नासर पुगेका रोनाल्डो माथि दुई खेलको प्रतिवन्ध छ। इंग्लिस फुटलब एसोसिएसनले केहि समय अगाडी उनलाई दुई खेलका लागि प्रतिवन्ध लगाएको थियो।
उनलाई नोभेम्बरमा एभर्टन समर्थकको मोबाइल फुटाइदिएको घटनामा दोषी पाइएको थियो। उनले दुई खेल प्रतिबन्धका कारण आगामी १४ जनवरीमा पनि अल सबाबविरुद्धको खेलमा डेब्यू गर्न पाउने छैनन्।
त्यसको एक साता भन्दा बढी समय पछि अल-नासरएल अल इतिफाकविरुद्धको सामना गर्नेछ। सो खेलमा भने रोनाल्डोले डेब्यू गर्न सक्छन्। जनवरी २२ मा रोनाल्डोले डेब्यू गर्न सक्ने उच्च सम्भावना रहेको साउदीका खेल मिडियाहरुले पनि जनाइरहेका छन्।
जनवरी २२ मा हुने साउदी प्रो लिगको खेलमा अल इतिफाकविरुद्ध खेल्नु भन्दा अगाडी अल-नासरले पेरिस सेन्ट जर्मेइन (पिएसजी)सँग मैत्रीपूर्ण खेल खेल्ने कार्यतालिका रहेको छ। सो खेलमा रोनाल्डो हुने नहुने भन्ने बार कुनै पनि खबर बाहिर आएको छैन। सो खेलमा रोनाल्डो खेल्ने सम्भावनालाई नकार्न सकिँदैन।
कस्तो छ साउदी प्रो लिगमा अल नासरको खेल तालिका
१४ जनवरीमा अल सबाबविरुद्ध खेलेपछि अल-नासरले जनवरी २२ मा अल इतिफाकविरुद्ध खेल्नेछ। त्यस्तै अल-नासरले अल इतिहादविरुद्ध २५ जनवरी र अल फतेहविरुद्ध ३ फेब्रुअरीमा खेल्नेछ। यस्तै अल वेह्दाविरुद्ध ९ फेब्रुअरीमा अल-नासरको सामना हुनेछ।