काठमाडौं । पाटन उच्च अदालतले २० लाख धरौटीमा रिहा गरेपछि राष्ट्रिय क्रिकेट टिमका पूर्वकप्तान सन्दीप लामिछाने यतिबेला परिवारसँग समय व्यतित गरिरहेका छन् । हात्तीवनस्थित घरमा बुवाआमा र परिवारका सदस्यसँग बसिरहेका उनको मानसिक स्वास्थ्य सुधारोन्मुख छ ।
बलात्कार आरोपमा बन्दी जीवन बिताइरहँदा सन्दीपको मानसिक स्वास्थ्यमा समस्या उत्पन्न भएको थियो । डिप्रेसनका लक्षणहरु देखिएपछि उनलाई जेलभित्रै काउन्सीलिङ समेत सुरु गरिएको थियो । जेलबाट बाहिर निस्किएपछि भने उनी धेरै हदसम्म आत्मविश्वासी देखिएका छन् ।
स्रोतले भन्यो, ‘उच्च अदालतको आदेशपछि उनको मनोविज्ञान फेरिएको छ । आफूले न्याय पाउनेमा उत्साही र आशावादी देखिएका छन् ।’ सन्दीप अहिले परिवारमा रहेका बालबच्चासँग बढी समय बिताइरहेका छन् । दाजूका छोराछोरी र अन्य आफन्तका बच्चाहरु अहिले उनको परिवारमा छन् । अहिले उनलाई काउन्सीलिङको आवश्यकता नदेखिएको स्रोतको भनाइ छ ।
सन्दीपलाई बाहिरी व्यक्तिहरुसँग भने भेट्न दिइएको छैन । भेट्न आउनेहरु पनि गेटबाटै फर्किने गरेका छन् ।‘मान्छेहरु आएर अनेकथोक सुनाउलान् र मानसिक असर पर्ला भनेर हामीले भेटघाट बन्द गरेका हौं,’ पारिवारिक स्रोतले भन्यो ।
राष्ट्रिय टिमका खेलाडी वा नेपाल क्रिकेट संघका पदाधिकारीहरु उनलाई भेट्न आएका छैनन् । फोनबाट भने कुराकानी भइरहेको छ । क्रिकेट संघका पदाधिकारीहरुले फोन गरेर उनको सञ्चोविसञ्चो सोधेका थिए ।
जेलबाट रिहा भएलगत्तै सन्दीपका कानून व्यवसायीले उनलाई फेरि क्रिकेट कप्तान बनाउन क्यानसँग माग गरेका थिए । क्यानले पनि सन्दीपलाई राष्ट्रिय टिममा फर्काउनेबारे सकारात्मक प्रतिक्रिया दिएको थियो । तर, तत्काल सन्दीप राष्ट्रिय टिममा फर्किने सम्भावना भने देखिएको छैन । अदालतले सन्दीपलाई मुद्दाको फैसला हुँदासम्म विदेश जान रोक लगाएको हुँदा राष्ट्रिय टिममा फर्काउन सम्भव नदेखिएको हो ।
क्यानका सचिव तथा प्रवक्ता प्रशान्तविक्रम मल्लले सन्दीपलाई मैदानमा फर्काउनेबारे आफूहरु छलफलमै रहेको बताए । नेपाल प्रेससँग कुरा गर्दै उनले विभिन्न सरोकारवाला निकायहरुसँगको परामर्शपछि निर्णय लिइने उल्लेख गरे ।
‘अदालतले लगाएका बन्देजहरुलाई पनि हामीले हेर्नुपर्ने हुन्छ । टिममा फर्काउन मिल्ने/नमिल्ने विषयमा हामी खेलकुद परिषद लगायत राज्यका हरेक निकायहरुसँग छलफलमा छौं । मिल्ने अवस्था देखियो भने खेलाइन्छ, नत्र अहिले खेलाइन्न,’ उनले भने ।
मल्लले सन्दीपसँग आफूहरुको फोनमा कुरा भइरहेको बताए । केही दिन रेस्ट गरेपछि भेटघाट गर्ने सल्लाह भएको उनले जानकारी दिए ।
‘क्रिकेट टिममा फर्किनेबारे सन्दीपले हामीसँग केही पनि भनेको छैन,’ उनले भने ।
जबरजस्ति करणीको आरोपमा पक्राउ परेका सन्दीपलाई गत साता पाटन उच्च अदालतले धरौटीमा रिहा गरेको थियो । उनको मुद्दा भने विचाराधीन रहेको छ ।