काठमाडौं । महाशिवरात्रिका दिन भारतबाट आएका जोगीहरूले हिजो पशुपति मन्दिरमा वितण्डा मच्चाएका छन् । उनीहरूले वाइफाइ चाहियो भन्दै हल्लाखल्ला गर्नेदेखि दर्शनार्थीहरुलाई लखेटेर कुटपिट गर्नेसम्मका हर्कत गरे । तर, प्रहरीले कसैलाई पनि पक्राउ गरेको छैन ।
सामाजिक सञ्जालमा एउटा भिडियो भाइरल भएको छ, जसमा नागाबाबाहरुको झुन्डले हातमा लौरो बोकेर दर्शनार्थीलाई लखेटेको र कुटेको देखिन्छ । मन्दिरकै गेटनजिक उनीहरूले यसरी दर्शनार्थीमाथि जाइलागेका थिए । भिडिओमा बाबाहरूले दक्षिणा थोरै भएको भन्दै आक्रोश व्यक्तगरेको पनि सुनिन्छ ।
हरेक वर्ष महाशिवरात्रिमा भारतबाट हजारौँको संख्यामा नागाबाबा र जोगीहरू आउने गरेका छन् । पशुपति क्षेत्र विकास कोषले उनीहरूको रेखदेख मात्रै होइन केही दिनको खान बस्ने व्यवस्था गरेको हुन्छ । साथै केही दक्षिणासमेत दिएर बिदा गर्छ ।
महाशिवरात्रिका दिन पशुपति क्षेत्रका विभिन्न निर्धारित स्थानमा नागाबाबाहरु बस्छन् । उनीहरूलाई भक्तजनहरूले पैसा दान पनि गर्छन् । तर यस्ता नागाबाबाहरुको हर्कत भने सामान्य खालका हुँदैनन् । हरेक शिवरात्रिमा उनीहरू दक्षिणको विषयलाई लिएर लफडा गर्छन् । महिला भक्तजनप्रति अभद्र तरिकाले प्रस्तुत हुन्छन् । यसपालि त उनीहरूले झनै अराजकता देखाए ।
सोही क्रममा एक नागाबाबाले युट्यूव च्यानलमा आपत्तिजनक अभिव्यक्तिहरू समेत दिए । भारतकै रोटी खाएर बाँचेका नेपालीहरूले आफूहरूलाई अपमान गरेको भन्दै उनी जंगिएको भिडियो सामाजिक सञ्जालमा भाइरल छ । ‘कतिपय साधुले हामीलाई वाइफाइ चाहियो, इन्टरनेटको सुविधा भएन भनेर पनि कराइरहेका थिए । यस्तो भौतिक सुविधा खोज्नेहरूलाई कसरी व्यवस्थापन गर्ने ?’ उनले भने । हिजो नागाबाबाको आक्रमणमा परेका व्यक्ति सामान्य भक्तजन भएको अधिकारीले जानकारी दिए ।